Mudansa Klimatika

Ola ! Belum sira, imi hotu di'ak lae?

Espera imi hotu di'ak...☺❤

kolega sira balun iha traballu konaba Mudansa Klimatika maibe sei konfunde oinsa atu halo,...

iha kraik ne'e artigu konaba Mudansa Klimatika kompostu husi Introdusaun to iha base legal sira ne'ebe hakerek iha KRDTL no Konvensaun no protokolu ne’ebe ratifika iha Timor Leste.

Introdusaun

Mudansa Klimatika sai nuudar ameasa boot ida ba iha mundu ohin loron hodi dezafia ba ekonomia mundial, social no ambiente. Ho mudansa klimatika ne’ebe akontese dadaun ne’e fo impaktu ba iha bee menus, rai maran, hodi afeta ba iha atividade agrikultura mak hanesan produsaun agrikultura tun no akontese rai hamlaha hodi kontribui ba iha mal nutrisaun aumenta. No fo mos afeta ba iha espesie lubuk ida mak halo imigrisaun, aleinde kasu hirak ne’e akontese mos fenomena El-Nino foin lalais akontese iha 2015 no kontinua iha 2016. Tan ne’e mak importante tebes ba ita atu bele adapta no mitigasaun tuir sensibilidade no kapasidade ema nia atu bele hadia sistema agrikultura hodi bele kontribui ba aumenta produsaun hodi bele redus ba mal nutrisaun iha ita rai.

Definisaun tuir teoria

Mudansa klimatika hanesan mudansa iha elementus klima inklui mudansa iha temperature, udan been, no modelu anin. Mudansa klimatika akontese tamba konsentrasaun gas estufas iha atmosfera ne’ebe as no aumenta ba beibeik, konsentrasaun gas estufas ne’ebe as resultadu hosi atividade ema nia hanesan; industria ka fabrika transporte, sunu ailaran, jestaun ba lixu ne’ebe la diak no atividade seluk hosi seitor agrikultura nian.

El-Nino katak; fenomena mudunsa iha klima global ne’ebe kausa hosi aumento manas temperature tasi iha samudra pasifiku parte norte. El-Nino akontese kada tinan 4-7 no bele aziste durante fulan 12-15.

La-Nina katak; fenomena mudansa iha klima kausa hosi menus temperature tasi iha samudra pasifiku hosi standar normal kompara ho fatin seluk (Irwan 2006), ne’ebe afeta ba anin, kalohan nomos udan ba Australia no Sudeste Asiatiku inklui Indonesia no Timor Leste.

Impaktu sira ne’ebe iha

•                   Estragus ekositema ai-parapa.
• Hamosu inundasaun, laloran bo’ot, anin bo’ot ne’ebe halao imigrasaun ikan no fo impaktu ba menus produsaun.
•                   Estragus infraestrutura pescas.
•                   Fo impaktu ba peskador sira.
•                   Populasaun ikan komesa menus.
•                   Hamosu gas karbonodiosida (CO2) no suar ne’ebe mak halo mundu sai manas liu tan
•       Ho temperatura manas ne’ebe mak aumenta ba bei-beik sei provoka zelu naben no halo nivel tasi ben sae as liu rai maran iha parte norte no sul hodi fo ameasa no estragus ba komunidade nia hela fatin no infrastrutura basiku.
•             Hamenus kbi’it ai laran atu absorve karbondioksida (CO2) hodi prosesa sai fali oksigenio (O2).
•        Sunu rai arbiru hodi kontribui ba dezastre naturais; mota bo’ot, rai halai, rai maran, rai krekas nst.
•                   Rai ne’ebe besik iha tasi ibun sei menus ba bei-beik.
•                   Rekursu be’e rai okos sei menus.
•                   Hamenus rai bokur hodi afeta ba produsaun ai-han.
•                   Halakon/muda fatin balada fuik sira nia hela fatin no obriga rekuru biodeversidade balun hodi muda ba fatin seluk no ikus mai species balun bele lakon iha Timor Leste.

Base legal sira

•    KRDTL Artg 6^o (f); sidadaun hotu-hotu iha dever atu proteze meio-ambiente no konserva rekursu naturais    
•   KRDTL Artg 61^o

1. Ema hotu-hotu iha direitu atu moris iha ambiente ema moris nian ne’ebe mo’os nabelun diak ho natureza, no iha obrigasaun atu halo diak ba jerasaun ikus mai.

2. Estadu rekoenese katak iha necessidade atu tau matan didiak no fo valor ba ita nia rain nia riku soin.

3. Estadu tenki fo sai buat ne’ebe mak sei halo atu defende natureza maibe sei halo mos ho nia ekonomia.

•     Regulamentu UNTAET Nu.19/2000 koalia konaba areas protezidas iha Timor Leste.
•     Decreto lei Base Ambiental 26/2012 koalia konaba kbit no forsa toma valida tia ona iha rai moris hodi proteje ema moris iha ambiente ne’ebe sustentavel liu hosi programa (Tara Bandu)

Konvensaun no protokolu ne’ebe Timor Leste ratifika

1.    Konvensaun ONU ba alterasaun klimatika United Nation Framework Convention on Climate Change (UNFCCC) ne’ebe adere iha Tinan 2006, no tama iha forsa iha tinan 2007.
2.     Protokolu Kyoto fase I, iha 2008 no tama iha forsa marsu 2009.
3. . Konvensaun ONU ba Diversidade Biologika United Nation Convention on Biological Diversity (UNCBD) ne’ebe adere iha 8 janeiru 2007.
4.    Konvensaun ONU ba desertifikasaun United Nation Convention to Combat Disertification (UNCCD) ne’ebe adere iha tinan 2006.
5. . Konvensaun Vieana no ninia protokolo Montereal, konaba substancia ne’ebe maka hamihis camada do ozono, Timor Leste ratifika iha 16 Setembru 2009.